303
Shares
चितवन: अन्तर्राष्ट्रिय मापदण्डको भवन निर्माण गर्ने महत्वाकांक्षी योजनाका साथ सुरु गरिएको भरतपुर विमानस्थलको आधुनिकीकरण प्रक्रिया विदेशी सामग्री नआउँदा अवरुद्ध भएको छ। १ अर्ब ९० करोड लागतमा निर्माणाधीन आधुनिक टर्मिनल भवनको छानोको डिजाइन परिवर्तन गरिएपछि चार महिनादेखि निर्माण कार्य रोकिएको छ।
"पोखरा अन्तर्राष्ट्रिय विमानस्थलको जस्तै गुणस्तरीय र आकर्षक छानो निर्माणका लागि विदेशबाट विशेष प्रकारको जस्तापाता आयात गर्नुपर्ने भएकाले निर्माण अवरुद्ध भएको हो," निर्माण कम्पनी क्षमादेवी कन्स्ट्रक्सन सोलुसन प्रालिका इन्जिनियर सुनील साहले बताए।
२०८० वैशाख ७ देखि सुरु भएको नयाँ भवन निर्माणको कार्य हालसम्म ५० प्रतिशत सम्पन्न भइसकेको छ। निर्माणाधीन भवनमा एकैपटक एक हजार यात्रुको आवतजावत क्षमता हुनेछ, जुन वर्तमान भवनको तुलनामा निकै ठूलो हो। पर्यटन प्रवर्द्धन र यात्रु सुविधालाई मध्यनजर गर्दै भवनमा मनोरञ्जन पार्क, आधुनिक रेस्टुरेन्ट र विदेशी पर्यटकलाई लक्षित बजारको समेत व्यवस्था गरिँदैछ।
"यो केवल विमानस्थल मात्र होइन, मध्य नेपालको आर्थिक विकासको इन्जिन बन्ने छ," भरतपुर महानगरपालिका प्रमुख रेनु दाहालले बताइन्। उनले नयाँ भवन सम्पन्न भएपछि भरतपुरको पर्यटन र व्यापारिक गतिविधिमा उल्लेखनीय वृद्धि हुने विश्वास व्यक्त गरिन्।
आधुनिक टर्मिनल भवनको निर्माण अगाडि बढे पनि धावनमार्ग विस्तारको कार्य भने अझै अनिश्चित रहेको छ। विमानस्थलको उत्तरतर्फ रहेको नेपाली सेनाको घोडा प्रजनन केन्द्रलाई स्थानान्तरण गर्नुपर्ने हुँदा धावनमार्ग विस्तारमा जटिलता आएको हो।
"सेनाले आफ्नो नयाँ भवन निर्माण पूरा भएपछि मात्र हालको स्थान खाली गर्ने अडान लिएको छ, जसले विस्तारको कामलाई प्रभावित गरेको छ," भरतपुर विमानस्थल कार्यालय प्रमुख दीपक विकले जानकारी दिए।
वर्तमान १ हजार १५८ मिटरको धावनमार्गलाई कम्तीमा १ हजार ५ सय मिटरसम्म विस्तार गर्न सके ७२ सिट क्षमताको एटिआर जहाज अवतरण गराउन सकिने प्रमुख विकको भनाइ छ। अहिले भरतपुर विमानस्थलमा एटिआर ४२ र ट्विनअटर जहाजले मात्र उडान र अवतरण गर्दै आएका छन्।
२०१५ सालमा संयुक्त राज्य अमेरिकाको सहयोगमा मलेरिया नियन्त्रण कार्यक्रम अन्तर्गत निर्माण गरिएको भरतपुर विमानस्थलले आफ्नो ६० वर्षको इतिहासमा अहिलेसम्मकै ठूलो परिवर्तन देख्न लागेको छ। विमानस्थल हाल १० घण्टाको हाराहारीमा मात्र सञ्चालन हुँदै आएकोमा विस्तारसँगै रात्रिकालीन उडानसमेत गर्ने तयारी रहेको छ।
भरतपुर विमानस्थलमा ठूला जहाजको अवतरणले काठमाडौँ-चितवन हवाई यात्रामा खर्च समेत घट्ने अपेक्षा गरिएको छ। हाल पाँच हजार रूपैयाँ रहेको हवाई भाडा ठूला जहाज आएपछि उल्लेख्य रूपमा घट्ने विक बताउँछन्।
विमानस्थल आधुनिकीकरणसँगै पर्यटकहरुको संख्यामा वृद्धि हुने र यसले मध्य नेपालको पर्यटन व्यवसायलाई समेत टेवा पुग्ने विश्लेषकहरुको भनाइ छ। नियमित अन्तरदेशीय उडानसहितको आधुनिक विमानस्थलको निर्माणले पर्यटन, व्यापार र रोजगारीमा प्रत्यक्ष योगदान पुर्याउने अपेक्षा गरिएको छ।
निर्माणाधीन भवनस्थलमा २०० कार र ४०० मोटरसाइकल पार्किङ गर्न मिल्ने गरी पार्किङ क्षेत्र, अग्नि नियन्त्रण केन्द्र, आधुनिक नियन्त्रण कक्ष तथा अन्य आवश्यक सुविधाहरू समेत समावेश गरिएको छ।
तर यी सबै सुविधाहरूको निर्माण विदेशी सामग्री आयातमा निर्भर रहेकाले निर्माण कार्य अवरुद्ध हुँदा मध्य नेपालका नागरिकहरु आधुनिक हवाई सेवाबाट वञ्चित भएका छन्। तीन वर्षभित्र निर्माण सम्पन्न गर्ने लक्ष्य राखिएको यस आयोजनाको चाँडो सम्पन्नताको लागि सरोकारवालाहरुले पहल गर्नुपर्ने आवाज उठेको छ।
From Facebook